ماهو التقشير؟

بسم الله الرحمن الرحيم

منقول  مع تعديلي لبعض النقاط

الـــتـــقــــشــــيــر

التقشير: هو ازالة الطبقة السطحيه او العميقه من الجلد .

انواع التقشير:

1- تقشير فيزيائي ( Exfoliation )

2- تقشير كيميائي ( peeling or exfoliation )

الفرق بين Exfoliation اكسفوليشن و peeling بيلنق .

Exfoliation : تعني تقشير سطحي للبشره . ( بالبيت )

قشورخفيفه على البشره واحمرار خفيف(كيميائي ) .

او

مجرد كشط للجلد و تنعيمه واشراقه ( فيزيائي )

Peeling : تقشير عميق للبشره .

راح تشوفين الجلد يقشر بقوووه وينصلخ ( كيميائي ) ( بعيادة الجلدية سابقا لكن الان بالبيت الكثير يعملوه رغم مخاطره )

التقشير الفيزيائي : عبارة عنScrub) ) صنفرة الجلد لإزالة الخلايا السطحية الميته بالفرك يدويا .

يستخدم لهذا النوع منتجات كثيره اغلبها معروفه

مثل من هيملايا

اغلب الانواع تشترك في صفه وحده وهي وجود الحبيبات وهي اللي تقوم بعمليه كشط الجلد وازالة الطبقه السطحيه .

ممكن تسوي صنفرة بالسكر او الملح ( ابتعدي عن الملح الخشن يسبب خدوش للبشره )

الانواع هذي من التقشير ( التقشير الفيزيائي) ممكن تستخدم مرتين بالاسبوع تنعم الجلد تزيل الخلايا الميته وتعطي اشراقه بسيطه .

..........................

2- التقشير الكيميائي : ازالة طبقة من الجلد ( سطحيه او عميقه ) باستخدام المحاليل الكميائيه او الكريمات الطبية .

ينقسم الى 3 انواع : خفيف, متوسط العمق , عميق .

التقشير الخفيف( Exfoliation ): باستخدام

احماض الفواكه Alfa-Hydroxy-acid وهي انواع كثيره .

واشهر نوعين يستخدمون هم :

'glycolic Acid جلايكوليك اسيد

و

Acid salicylic ساليسليك اسيد

يرمز له AHA ويستخدم بنسبة 5 % الى 20 % هذا النوع تقدرين

تشترينه من الصيدليه وتستخدمينه بالبيت في منه انواع على حسب الشركه المنتجة .

التقشير الخفيف باستخدام هذي الانواع ممكن يسبب احمرار بسيط ويعطي نتايج

جيده ممكن يفتح اثار حب الشباب , يخفف النمش, ينعم البشره و يعطي نضاره

واضحه لكن يحتاج لفتره حتى تظهر النتايج لازم استخدام يومي لمدة

شهر على الاقل واستخدام الواقي الشمسي وترطيب البشره باستمرار.

التقشير متوسط العمق : فيه منه نوعين باستخدام

احماض الفواكه ( AHA )

أو

حمض ثلاثي كلور الخليك ( TCA )

اللي باحماض الفواكه يكون بنسبة 50 % الى 70 % لازم يكون

بعيادة الجلديه .

وهذا النوع ممكن نسويه على عدة جلسات على حسب المشكله اللي نعاني منها

ويعطي نتايج افضل واسرع من التقشير الخفيف خصوصا لأثار حب الشباب

يخففها بشكل كبير وينفع للنمش الخفيف ويشد البشره ويقلل التجاعيد هذا

النوع يسبب احمرار للبشره وحرقان وتهيج يزول خلال ساعات يعني عادي

تسوينه وتروحين وتجين ماراح يأثر عليك اهم شي الواقي والترطيب المستمر .

......

النوع متوسط العمق :حمض ثلاثي كلور الخليك

Trichloracetic acid ويرمز له TCA

هذا النوع تسوينه بعيادة الجلدية سابقا والان  اصبح يباع للاستخدم المنزلي(لكنه خطر جدا) وغالبا يكون بتركيز 15% الى 50 % كل مازاد

التركيز زادت قوة تقشرالبشره وتنصلخ بشكل واضح ويكون الوجه شديد الاحمرار

النوع هذا فضااااااح يعني اذا بتسوينه رتبي اوضاعك خوذي اجازه اذا كنتي

موظفه ولا تطلعين من البيت اذا كنتي ماتبين احد يغثك بالأسئلة ( وش فيها بشرتك

وعسى ماشر وسلامات ) لان اللي بيشوف وجهك على باله محترق .

هذا النوع غالبا من جلسة وحده او بالكثيييير جلستين راح يعطي نتايج ممتازه

خصوصا اذا التزمتي بالتعليمات ( راح اقولها بنهاية الموضوع )

تقشير الــ TCA

ممتاز لأثار وندب حب الشباب والكلف والنمش وفرط التصبغات والتجاعيد واثار

الاسمرار الناتج من الشمس .

النوع الاخير وهو العميق : ويكون باستخدام الفينول phenol peel

وهذا النوع شغلته شغله ويحتاج تنويم بالمستشفى وتخدير ولازم يعطون محاليل

وريديه ويراقبون القلب وهو عكس كل الانواع السابقه تزيد قوته كلما قل تركيزه

هذا النوع فعاااال في ازالة التجاعيد العميقه ويحتاج لفترة نقاهه طويله

قبل التقشير الكيميائي:

-

1- ماتتعرضين للشمس ولو اضطريتي احرصي على الواقي الشمسي مايقل عن

30 spf .

2- ماتزيلين الشعر من المنطقه اللي راح تسوين لها تقشير قبل يومين سواء بالحلاوه بالفتلة الشمع عشان لا تتهيج .

3- ماتقشرين منطقه فيها جروح او حبوب متقيحه ( يعني تحسين فيها سوائل صديديه او محمره مررره )

4- حاولي تهيأين البشره للتقشير باستخدام احماض التريتينيون مثل ( رتن أي _ اكرتين _ ريتا كنيل ) كلها فيها نفس الماده الفعاله تستخدمينها قبل التقشير باسبوع .

5- ماتحطين شي يوم التقشير ( كريم ترطيب معطر , مكياج , عطور ) كله ممنوع .

بعد التقشير :

-

1-تنظفين المنطقه يوميا بمويه دافيه وصابون يفضل مايكون معطر لا تفركين ولا تدعكين باطراف اصابعك بس .

2- لو كان في الم ممكن تاخذين مسكن .

3- تحرصين على الواقي الشمسي .

4- اول 3 ايام تمسحين وجهك بطبقه رقيقه من مضاد

الالتهابات فيوسيدين ( ابو اسد ) لو كان التقشير TCA 25%

فما فوق .

5-انتبهي تتعبثين بالقشور وتسحبين الجلد الميت ترى احتمال يترك اثار وندب خلي الجلد المتسلخ و القشور تنزل لحالها .

6-بعد اسبوع تقريبا من التقشير تستخدمين كريم رتن أي او اكرتين او ريتا كنيل وتخلطينه مع الدوكين فورت او أي كريم ثاني يحتوي على الهيدروكينون ليــــه ؟؟

حتى تساعدين على ظهور النتايج الجيده ولان الكريم راح يمتصه الجلد كويييييس بعد التقشير وراح يعطي نتيجه جيده مع التقشير وعشان تمنعين تصبغ الجلد وتحافظين على النتايج والصور اللي شفتيها فوق بعضهم استخدموا هذي الطريقه .

(لمدة شهر بعدين توقفين الرتن أي وتستخدمين أي كريم مرتاحه عليه )

7- حاولي ترطبين البشره بمرطب غير معطر .

الاثار الجانبيه للتقشير :

-

1-التصبغات الجلديه وغالبا تحدث للبشره السمراء ( عشان كذا احرصي على الواقي والكريم بعد اسبوع ) .

2- الحبوب الخفيفه والبثور ( عشان كذا لا ترطبين المنطقه بمرطب ثقيل )

3- تحسس للبشره واحمرار بعض المناطق ( نادر) يختفي بعد اشهر .

ابتعدي عن التقشير اذا :

1-بشرتك حساسه مررره واقل شي يهيجها

2- بشرتك فيها حبوب ( عالجيها اول ثم قشري المنطقه )

3- حامل وعند ك نمش وكلف اتنظري لما تقومين بالسلامه وادهري بعمرك .

4- بشرتك مافيها شي بس تبينها تبيض ( ماراح تستفيدن بشرتك هيه هيه اللهم شوية نضاره وصفاء اما اللون نفسه )

ملاحظه :

جميع الانواع السابقه يمكن استخدامها على بشرة الوجه والجسم

الاختلاف بس في تركيز المادة الوجه راح يكون اخف تركيز من

الجسم .



انستقرام: wow.me.wow@